اکیسویں صدی سے دیار حبیب صلی اللہ علیہ وسلم سے ہندستانی مسلمانوں کے روابط
تیرھویں قسط
شاہ فیصل کی شہادت پر اظہار تعزیت اور حج کی سہولیات کی اپیل پر کامیابی
مارچ 1975 کو شاہ فیصل ریاض میں قاتلانہ حملے میں شہید ہوگئے۔ بعد ازاں 18 جون 1975 کو قاتل کو سرِعام سزائے موت دی گئی۔ شاہ فیصل کی وفات پر مولانا سید احمد ہاشمی نے 27 مارچ 1975 کو شائع ہونے والی اپیل کے ذریعے ملک بھر میں تعزیتی اجتماعات اور یومِ وفات منانے کی درخواست کی۔29 مارچ 1975 کو جامع مسجد دہلی کے اردو پارک میں جمعیت علمائے ہند کے زیر اہتمام عظیم الشان تعزیتی جلسہ منعقد ہوا، جس میں مختلف مذہبی، سیاسی رہنماؤں، عرب لیگ، سعودی، مصری اور دیگر عرب سفارت خانوں کے نمائندوں نے شرکت کی۔ مقررین نے شاہ فیصل کی دینی، سیاسی اور ملی خدمات، عرب اتحاد، فلسطین کی حمایت، اسلامی بیداری اور عرب و ہند تعلقات کے فروغ میں ان کے کردار کو خراجِ عقیدت پیش کیا۔ اس موقع پر ایک جامع تعزیتی قرارداد بھی منظور کی گئی، جس میں شاہ فیصل کی خدمات کو سراہتے ہوئے ان کے لیے دعائے مغفرت اور ان کے جانشینوں کے لیے دعا کی گئی۔ اس جلسے کی تفصیلات 31 مارچ، 2 اپریل اور 5 اپریل 1975 کے روزنامہ الجمعیۃ میں شائع ہوئیں۔بعد ازاں 9 اور 10 اپریل 1975 کو مجلس عاملہ کے اجلاس کے دوران جمعیت کے اراکین نے سعودی سفارت خانہ جا کر سفیرِ سعودی عرب سے ملاقات کی اور شاہ فیصل کی شہادت پر تعزیت پیش کی۔آخر میں 13 اگست 1975 کو سعودی عرب کے سفر کے دوران مولانا سید اسعد مدنی نے حکومتِ سعودی عرب سے ہندستانی حجاج کے مسائل پر گفتگو کی، جس کے نتیجے میں حج کے بعد چالیس روز کی قیام کی پابندی اور اس کے بعد روزانہ تیس ریال فیس کی شرط ختم کر دی گئی۔ 1979 میں جمعیت علمائے ہند نے ہندستانی حجاج کو بہتر سہولیات فراہم کرانے کے لیے اپنی کوششیں تیز کیں۔ 12/فروری 1979 کو سعودی وزیرِ حج عبد اللہ بوقس کو، جو شاہ خالد کے نمائندہ کی حیثیت سے ہندستان آئے ہوئے تھے، ایک میمورنڈم پیش کیا گیا، جس میں مکہ مکرمہ اور مدینہ منورہ کے ہندوستانی رباطوں کی بحالی، مرمت اور بہتر انتظام کا مطالبہ کیا گیا۔ وزیرِ حج نے یہ یقین دہانی کرائی کہ یہ میمورنڈم شاہ خالد کی خدمت میں پیش کیا جائے گا۔ اس کے بعد 16، 17 اور 18/فروری 1979 کو منعقدہ کل ہند اوقاف کانفرنس نے بھی سعودی عرب میں ہندستانیوں کے وقف کردہ رباطوں اور اوقاف کی اصل حیثیت بحال کرنے، ناجائز قابضین کی تحقیقات، حج کے ایام میں ہندستانی زائرین کے لیے ان کے استعمال اور حرمین کی توسیع کے سبب حاصل ہونے والے معاوضے سے جدید رہائشی سہولتیں فراہم کرنے کا مطالبہ کیا۔
(جاری)۔۔۔۔۔۔
@all
