دیوبند، 24 ستمبر: دارالعلوم وقف دیوبند کے ناظمِ کتب خانہ مولانا انعام الحق قاسمی کی مرتب کردہ اہم علمی و تحقیقی کتاب ’’حکیم الاسلام کے حکیمانہ جوابات‘‘ کی رسمِ اجرا آج دارالعلوم وقف دیوبند کی حجۃ الاسلام اکیڈمی میں ایک باوقار علمی تقریب کے دوران عمل میں آئی۔ تقریب میں دارالعلوم وقف دیوبند کے نائب مہتمم حضرت مولانا ڈاکٹر محمد شکیب قاسمی دامت برکاتہم، اساتذۂ کرام اور متعدد اہلِ علم و دانش شریک ہوئے۔
مولانا انعام الحق قاسمی کی یہ تیسری اہم علمی کاوش ہے۔ اس سے قبل آپ کی مرتب کردہ کتابیں ’’ہدیۃ الطالبین‘‘ اور ’’اسنادِ حدیث مشائخِ دارالعلوم وقف‘‘ منظرِ عام پر آچکی ہیں، جنہیں بالخصوص دارالعلوم دیوبند کے فضلاء، مشائخ و اساتذہ سے نسبت رکھنے والے اہلِ علم اور علمی حلقوں میں پذیرائی حاصل ہوئی ہے۔
زیرِ نظر کتاب ’’حکیم الاسلام کے حکیمانہ جوابات‘‘ میں حکیم الاسلام حضرت مولانا قاری محمد طیب صاحبؒ، سابق مہتمم دارالعلوم دیوبند، کے مختلف مواقع پر دیے گئے علمی، فکری، اعتقادی، فقہی اور اصلاحی جوابات کو یکجا کرکے ایک مفید علمی مجموعے کی صورت میں پیش کیا گیا ہے۔
حکیم الاسلام حضرت مولانا قاری محمد طیب صاحبؒ کی علمی و فکری شخصیت برصغیر کے علمی حلقوں میں معروف ہے۔ آپ دارالعلوم دیوبند کے طویل عرصے تک اہتمام سے وابستہ رہے اور اپنی علمی بصیرت، مفکرانہ شان، حکیمانہ قیادت، تدبر و فراست اور انتظامی صلاحیتوں کے ذریعے ادارے کی علمی و عملی ترجمانی میں نمایاں کردار ادا کیا۔ عصرِ حاضر کے تقاضوں اور بدلتے ہوئے حالات کے گہرے ادراک نے آپ کی شخصیت کو ایک عہد شناس عالم اور مفکر کی حیثیت عطا کی۔
حضرت حکیم الاسلامؒ کی علمی خدمات کا دائرہ نہایت وسیع تھا۔ خصوصاً پیچیدہ علمی، کلامی اور اعتقادی مسائل کو عقلی و نقلی دلائل کے ساتھ نہایت متوازن، حکیمانہ اور مؤثر انداز میں واضح کرنا آپ کے طرزِ استدلال کی نمایاں خصوصیت تھی۔ مختلف مجالس، ملاقاتوں اور دیگر علمی مواقع پر عقائد، فقہ، تصوف، اصلاحِ نفس اور دیگر موضوعات سے متعلق متعدد سوالات آپ کے سامنے پیش کیے جاتے رہے، جن کے آپ نے بصیرت افروز اور مدلل جوابات دیے۔
مرتبِ کتاب نے انہی منتشر علمی جواہر کو مختلف مصادر سے تلاش کرکے یکجا کرنے کی کوشش کی ہے۔ کتاب کی تیاری کے سلسلے میں حضرت حکیم الاسلامؒ کی مختلف کتابوں، مکتوبات، ملفوظات اور مجالس سے استفادہ کیا گیا ہے اور منتشر جوابات کو موضوعاتی مناسبت کے ساتھ مرتب کرکے قارئین کے سامنے پیش کیا گیا ہے۔ اس اعتبار سے یہ کتاب حضرت حکیم الاسلامؒ کے افکار و نظریات کو سمجھنے کے لیے ایک مفید مجموعہ بن گئی ہے۔
کتاب کی ایک نمایاں خصوصیت اس کی موضوعاتی جامعیت ہے۔ اس میں عقائد، اعمال، فقہ، تصوف، اصلاحِ نفس، علمِ کلام اور دیگر متنوع علمی و فکری موضوعات سے متعلق حضرت حکیم الاسلامؒ کے جوابات شامل ہیں۔ خصوصاً اعتقادی اور کلامی مسائل کے سلسلے میں مسلکِ اہلِ سنت والجماعت اور فکرِ دیوبند کی ترجمانی جس مدلل اور متوازن انداز میں کی گئی ہے، وہ طلبہ، اہلِ علم اور عام قارئین کے لیے قابلِ استفادہ ہے۔ اسی طرح اصلاح و تصوف سے متعلق جوابات عصرِ حاضر کے روحانی اور اصلاحی مسائل کے حوالے سے بھی اہمیت رکھتے ہیں۔
تقریب میں اہلِ علم کی شرکت
رسمِ اجرا کی تقریب میں دارالعلوم وقف دیوبند کے نائب مہتمم حضرت مولانا ڈاکٹر محمد شکیب قاسمی دامت برکاتہم، نائب امیرِ شریعت حضرت مولانا محمد شمشاد قاسمی، حضرت مولانا و مفتی ڈاکٹر محمد نوشاد نوری قاسمی، حضرت مولانا مفتی محمد عارف عثمانی، حضرت مولانا جمشید عادل، حضرت مولانا مفتی محمد سجاد قاسمی، حضرت مولانا مفتی غفران قاسمی، حضرت مولانا محمد اسجد عقابی قاسمی، حضرت مولانا مفتی محمد حسنین ارشد قاسمی، حضرت مولانا انور عزیز قاسمی دامت برکاتہم، حضرت مولانا محمود الرحمن، کتاب کے ناشر و کتب فروش ادارہ نگارشات بک اسٹور کے مالک حضرت مولانا عبدالرحمن قاسمی سمیت متعدد اساتذۂ کرام اور اہلِ علم نے شرکت کی۔
معزز شخصیات کے دستِ مبارک سے کتاب کی رسمِ اجرا انجام پائی۔ اس موقع پر اساتذۂ کرام نے کتاب کی علمی افادیت کو سراہتے ہوئے افکارِ حکیم الاسلامؒ کو نئی نسل تک پہنچانے کی اس کوشش کو اہم قرار دیا اور مرتبِ کتاب کی مزید علمی و تحقیقی خدمات کے لیے نیک خواہشات اور دعاؤں سے نوازاا۔
کتاب ’’حکیم الاسلام کے حکیمانہ جوابات‘‘ کی طباعت نگارشات بک اسٹور، دیوبند سے ہوئی ہے۔ کتاب کی طباعت، کاغذ اور جلد سازی کا خصوصی اہتمام کیا گیا ہے، جس کے باعث کتاب ظاہری اعتبار سے بھی عمدہ اور دیدہ زیب ہے۔ کتاب کی قیمت 120 روپے مقرر کی گئی ہے۔
کتاب دیوبند میں نگارشات بک اسٹور اور دیگر معروف کتب خانوں سے حاصل کی جا سکتی ہے۔
رابطہ نمبر-8791519573
