آسان انگریزی قواعد
بہ سلسلہ: تعارف مؤلفات جہازی(3)
دارالعلوم دیوبند کے زمانہ طالب علمی میں رمضان المبارک کی طویل تعطیلات کو بامقصد بنانے کے لیے راقم ہر سال کوئی نہ کوئی نیا پلان بنایا کرتا تھا، تاکہ یہ تعطیلات محض وقت گزاری میں نہ گزر جائیں،چنانچہ سالِ ششم کی رخصت میں تجارتی تجربات حاصل کرنے کے لیے مفتی شاکر عابدی صاحب کٹیہاری، بانی مہتمم جامعہ اسلامیہ دارالعلوم کٹیہار کی شراکت اور رہ نمائی میں پھل فروشی کا تجربہ کرنے کے لیے دہلی کا رخ کیا۔ لیکن اس تجربے نے اپنی ناکامی کی وجہ عدمِ تجربہ کو ہی بتلایا ؛ کیوں کہ دوسرے ہی دن پائی پائی جمع کردہ سارا سرمایہ ڈوبو کر دہلی بدری پر مجبور ہونا پڑا تھا۔
بہرحال، قصہ مختصر یہ کہ ایک سال راقم نے رمضان المبارک کی تعطیلات میں انگریزی زبان سیکھنے کا منصوبہ بنایا اور پھر اسی کام میں مصروف ہوگیا۔ اس دوران ایک مبتدی طالب علم کی حیثیت سے بارہا یہ احساس ہوا کہ اگر قواعد و ضوابط کو مروجہ طرز سے ہٹ کر الگ انداز سے پیش کیا جاتا تو ابتدائی درجے کے طلبہ زیادہ آسانی سے سمجھ سکتے، چنانچہ اپنے انھی تجربات کی روشنی میں انگریزی گرامر کے قواعد کو اپنے انداز میں مرتب کرنا شروع کردیا۔
چوں کہ مدارس کے طلبہ عربی قواعد، اصطلاحات اور گردانوں سے پہلے ہی واقف ہوتے ہیں، اس لیے راقم نے انگریزی کے Tenses کو بھی اسی طرز پر گردان، یعنی Conjugation، کی شکل میں مرتب کردیا اور انگریزی گرامر کی اصطلاحات کے لیے اردو اور عربی کے متبادل اصطلاحی الفاظ پیش کرکے اسے بالکل آسان بنانے کی کوشش کی۔ اس کا فائدہ یہ ہوا کہ مدارس کے طلبہ کو انگریزی گرامر سمجھانے کے لیے صرف صرف و نحو کی اصطلاحات کا نام بتادینا کافی ہے۔
اسے اس طرح کہا جاسکتا ہے کہ جس طرح بنیادی عربی قواعد سیکھنے کے لیے مبتدی طالب علم کو اگر صرف اتنا سمجھا دیا جائے کہ پیش آٹھ جگہ، زبر بارہ جگہ اور زیر صرف دو جگہ آتا ہے، تو سادہ جملے کو سمجھنا اور بنانا آسان ہوجاتا ہے۔ اسی طرز پر انگریزی میں بارہ Active Voice اور آٹھ Passive Voice کی گردانیں کل 20 گردانیں یاد کرلینے سے اتنی بنیادی انگریزی ضرور سیکھی جاسکتی ہے جس کے ذریعے ایک مدرسے کا طالب علم انگریزی زبان سے اپنی ناواقفیت کے احساسِ کمتری یا برتری سے نکل سکے اور کم از کم بنیادی جملوں کو سمجھنے اور بنانے کے قابل ہوجائے۔
اس کتاب کی بنیادی خصوصیت تو یہی ہے، لیکن اس کا مطلب یہ نہیں کہ اس میں اس کے علاوہ کوئی اور خصوصیت نہیں۔ کتاب میں انگریزی گرامر کو آسان بنانے کے لیے متعدد دیگر پہلوؤں کو بھی پیش نظر رکھا گیا ہے۔
اللہ تعالیٰ کے فضل و کرم سے یہ کتاب کئی سال پہلے شائع ہوئی تھی اور اس عرصے میں اسے غیر معمولی مقبولیت حاصل ہوئی۔ مختلف تعلیمی اداروں میں اسے داخلِ نصاب کیا گیا، دیگر زبانوں میں بھی اس کے تراجم ہوئے اور جب اسے انٹرنیٹ پر پیش کیا گیا تو صرف آٹھ ماہ کے اندر اس کے ڈاؤن لوڈ کی تعداد ایک لاکھ سے تجاوز کرگئی۔ یہ مقبولیت اس بات کی دلیل ہے کہ اگر کسی علمی موضوع کو طلبہ کی ذہنی سطح اور ضرورت کے مطابق آسان انداز میں پیش کیا جائے، تو وہ وسیع پیمانے پر قابلِ استفادہ بن سکتا ہے۔
قارئینِ کرام اس کتاب کو مکتبہ صوت القرآن، دیوبند سے حاصل کرسکتے ہیں۔
یہاں اختیاری مطالعہ کے طور پر پیش لفظ پیش کیا جارہا ہے تاکہ کتاب کا مکمل پس منظر سامنے آجائے۔
پیش لفظ
(اشاعت اول)
یوں تو مارکیٹ میں اردو زبان میں بھی انگریزی گرامر کی کئی ایک کتابیں موجود ہیں، لیکن اس کے باوجود راقم نے اس کتاب کو ترتیب دی۔ اس کی وجہ یہ ہوئی کہ ان کتابوں سے استفادے کے دوران شدت سے کئی چیزیں ایسی محسوس ہوئیں کہ جن کو اگر نقص یا کمی کا نام نہ بھی دیاجائے توکم سے کم یہ کہنا نا مناسب نہ ہوگا کہ اگروہ پیش کش تھوڑا کسی اور ڈھنگ اور طرز سے ہوتی تو زیادہ مفید اور کارگر ثابت ہوتی۔ انھیں باتوں کو پیش نظر رکھتے ہوئے راقم نے اس کتاب میں درج ذیل کوششیں کیں:
(الف) چوں کہ یہ کتاب اردو میڈیم اور ایک حد تک عربی گرامر جاننے والے طالب علم کو پیش نظر رکھ کر ترتیب دی گئی ہے، اس لیے ان کی دشواریوں کو ذہن میں رکھتے ہوئے انگریزی گرامر کے ہر اصطلاحی الفاظ کی اردو اور عربی متبادل اصطلاح دی گئی ہے۔
(ب) ہر اصطلاح اور انگریزی کے نئے الفاظ کے تلفظ کا بھی خیال رکھا گیا ہے۔
(ج)قواعد کی جو بحثیں موقوف علیہ کی حیثیت رکھتی ہیں، انھیں پہلے بیان کیا گیاہے، اور جو موقوف کی رکھتی ہیں، ان کا تذکرہ بعد میں کیا گیاہے۔ اسی وجہ سے اس کتاب کی بحثوں میں دیگر کتابوں کے مقابلے میں تقدیم و تاخیر پائیں گے۔
(د)اسباق کی تقسیم میں کتاب اور قواعد سے مناسبت پیدا کرنے کے لیے شروع کے اسباق چھوٹے رکھے گئے ہیں، لیکن بعد کے اسباق میں گرامر کا خیال رکھا گیا ہے، جس کی بنا پر بعض سبق کچھ بڑے ہوگئے ہیں۔
(ہ) ہر سبق کے آخر میں مشق دی گئی ہے، جس کی روشنی میں مزید مشقیں کی جاسکتی ہیں اور زبان کو بہتر سے بہتر بناسکتے ہیں۔
ان تمام خصوصیات اور کوششوں کے ساتھ یہ کتاب آپ کے ہاتھوں میں ہے۔ یہ کوشش کہاں تک کامیاب ہے، اس کا فیصلہ تو آپ کے ہاتھوں میں ہے، البتہ بندے کواتنا اور عرض کرنا ہے کہ عصر حاضر میں انگریزی زبان ٹکنالوجی اور سائنس کی زبان ہونے کی وجہ سے بین الاقوامی رابطے کی زبان کی حیثیت اختیار کرچکی ہے اور زندگی کے بیشتر معاملات: تجارت، بینکنگ، بین مذہبی روابط وغیرہ وغیرہ اسی زبان سے انجام دیے جارہے ہیں، اس بنیاد پر اس زبان کا سیکھنا جہاں ضروریات زندگی کی تکمیل کے لیے ضروری ہے، وہیں عالمی سطح پر اپنے مقاصد کی تبلیغ و اشاعت کے لیے اس سے بہتر کوئی اور متبادل سر دست موجود نہیں ہے۔ اس لیے ہم کہہ سکتے ہیں کہ عصر حاضر میں انگریزی سیکھنا ہر ممکن ضروری ہے۔
آخر میں ہم جناب مولانا عظیم اللہ صدیقی قاسمی کا شکریہ ادا کرنا واجبی فریضہ سمجھتے ہیں، جن کے تعاون اور کوششوں کو اس کتاب کو تمام مراحل سے گذار کر اشاعت کے مرحلے تک لانے میں برابر کا دخل ہے۔ اسی طرح مکتبہ صوت القرآن کے بھی ممنون ہیں کہ اس نے اشاعت کی ذمہ داری اٹھاکر اسے عام کرنے کا فریضہ انجام دیا۔ہم دعا گو ہیں کہ اللہ تعالیٰ معاونین کو اجر جزیل دے، قارئین کو جزائے خیر دے اور اس کتاب کو قبولیت عامہ سے نواز دے۔آمین۔
دعا جو
محمد یاسین جہازی


























