رہ نمائے خطابت
بہ سلسلہ تعارف مؤلفات جہازی(2)
دارالعلوم دیوبند میں زمانۂ طالب علمی کے دوران سالِ ہفتم میں ایک مرتبہ کراٹے فائٹ شو کے مقابلے میں شرکت کے نتیجے میں بایاں ہاتھ فریکچر ہوگیا۔ چنانچہ تقریباً چالیس روز تک ہاتھ پر پلاسٹر چڑھا رہا۔ بظاہر یہ ایک حادثہ تھا، جس نے درس گاہ سے غیر حاضری اور تعلیمی معمولات میں تعطل کا سبب پیدا کیا؛ لیکن قدرت کے فیصلوں میں بسا اوقات ایسے اسباب بھی پوشیدہ ہوتے ہیں، جو زندگی کو کسی نئے رخ سے آشنا کردیتے ہیں۔ اسی دوران درس گاہ سے ملنے والی فرصت نے دارالعلوم دیوبند کی عظیم الشان لائبریری سے شناسائی کا موقع فراہم کیا۔ چنانچہ مطالعے کا شوق ہر روز لائبریری لے کر جاتا اور ذوق ادب، اُردو ادب کی کتابوں سے روبرو کراتا۔ راقم کے تجربے کے مطابق اُردو ادب کی شاید ہی کوئی کتاب ہوگی، جو نظر سے نہ گزری ہو۔ اس ذوق جنوں نے پچھتر فی صد غیر حاضری کے زمرے میں ڈال کر بندے کی درجاتی ترقی موقوف کرادی۔
قصہ مختصر یہ کہ یہ غیر متوقع حادثہ تین کتابوں کی تالیف کا محرک بنا۔ زیرِ نظر مضمون میں انھیں تین کتابوں میں سے دوسری کتاب کا تعارف پیش کیا جارہا ہے۔
دارالعلوم دیوبند کے علمی و اسلامی ماحول میں عموماً اہلِ قلم درسی کتابوں کی شروحات یاتقریر پر کتابیں لکھتے ہیں، لیکن ناچیز نے اس مروجہ روش سے ہٹ کر فنِ خطابت کو موضوع بناتے ہوئے اسے ایک نئے اور منفرد انداز میں پیش کرنے کی کوشش کی۔ ناچیز کی ناقص معلومات کی مطابق خاید شورش کاشمیری کے بعد اس حلقے میں اپنی نوعیت کی یہ ایک منفرد کاوش ہے، جس کا اندازہ کتاب کے درج ذیل مشمولات سے لگایا جا سکتا ہے:
حرفے چند۔ انسان کی تخلیق کے نظریے۔ دنیا کا پہلا انسان۔ زبان کی ابتدا کے نظریے۔ دنیا کی پہلی زبان۔ زبان کے اختلاف کے اسباب و وجوہات۔ زبان و ادب کی تعریف و تشریح۔ ادب کی تقسیم۔ زبان و ادب اور زندگی۔ زبان و ادب کو برتنے کی صورتیں۔ عام بول چال کی زبان۔ تحریری و کتابی زبان۔ تقریری و خطابی زبان۔ تقریر کا آغاز۔ تقریر کی اہمیت و افادیت اور دنیا کی تعمیر و ترقی میں مقررین کا کردار۔ حکایاتِ خودی۔ تقریر و خطابت۔ موضوع۔ غرض و غایت۔ فنِ خطابت کے لیے لازمی علوم۔ علمِ ادب۔ علم النفس۔ علم منطق و فلسفہ۔ مطالعے۔ خطیب کو کیا کیا مطالعہ کرنا چاہیے؟ ادبیات کا مطالعہ۔ مذہبیات و اسلامیات کا مطالعہ۔ جغرافیہ کا مطالعہ۔ تاریخ کا مطالعہ۔ جنرل مطالعہ۔ اخبار و رسائل کا مطالعہ۔ تسلسلِ مطالعہ۔ سماعت و مشاہدہ۔ سماعت و مشاہدے کی صورتیں۔ مقرر کے لیے درکار صلاحیتیں۔ جرأت و خود اعتمادی۔ باخبر ذہن۔ مجمع کی نفسیات سے آگاہی۔ وسیع المطالعہ۔ ذخیرۂ الفاظ۔ سلاستِ لسانی۔ سلاست پیدا کرنے کے طریقے۔ خصائصِ خطابت یا رازہائے مقبولیت۔ صاف و شفاف سیرت۔ اخلاص و للہیت۔ شخصی وجاہت۔ بے عیب و شیریں آواز۔ دل کش اندازِ بیان۔ فطری لب و لہجہ۔ مترادفات کا استعمال۔ موقع شناسی۔ برجستہ گوئی۔ نستعلیق اشارات۔ موقع کے مناسب اندازِ خطاب۔ نقائصِ خطابت۔ اسٹیج سے گھبراہٹ۔ غیر مہذب اندازِ بیان۔ گھسا پٹا یا خشک موضوع۔ خود ستائی۔ حد سے زیادہ اظہارِ عاجزی۔ تکیہ کلام۔ ایکٹنگ اور مخصوص عادی حرکات۔ بے تحاشہ چیخ و پکار۔ نقالی و تقلید۔ سب بات بیان کرنے کی خواہش۔ خود نمائی و بے جا تکلفات۔ فیس بازی۔ تقریر کی تیاری۔ تیاری کے طریقے۔ عناصرِ ترکیبی۔ تمہید یا ابتدائیہ۔ دعویٰ۔ اثباتِ مدعی۔ دلائلِ نقلیہ۔ دلائلِ عقلیہ و منطقیہ۔ قیاس۔ قیاس ذو حدین۔ قیاسِ خلف۔ قیاسِ مرکب۔ قیاسِ برہانی۔ قیاسِ جدلی۔ قیاسِ خطابی۔ قیاسِ شعری۔ قیاسِ سفسطی۔ قیاسِ استقرا۔ قیاسِ تمثیل۔ دوران یا طرد و عکس۔ سِبر و تقسیم۔ تقابل و موازنہ۔ اثباتِ مدعی کے مزید دیگر طریقے۔ مراجعت۔ خلاصہ و اختتام۔ تقریر کی تقسیم۔ مذہبی تقریریں۔ سیاسی تقریریں۔ تعزیتی تقریریں۔ خطبے۔ تقریر کرنے کی مختلف صورتیں۔ تقریر کا سب سے عمدہ انداز۔ مبتدی خطیبوں سے چند گزارشات۔ مشقِ خطابت۔
اور آخر 160 نکات، اشارات، ہدایات درج کی گئی ہیں ۔
یہ کتاب کئی سال پہلے مکتبہ صوت القران دیوبند سے شائع ہو چکی ہے جسے قاری ابو الحسن صاحب دامت برکاتہم سابق استاذ دارالعلوم دیوبند کے فرزند ارجمند جناب فیض الحسن صاحب فروخت کر رہے ہیں۔
چوں کہ یہ زمانہ طالب علمی کی کاوش ہے، اس لیے علمی طرز کے بجائے رنگین اسلوب حاوی ہے ۔ تاہم حسن ظن یہی ہے کہ کتاب اپنے موضوع پر مفید ہے ۔اللہ تعالیٰ اس کی افادیت میں مزید اضافہ کرے۔ اللھم آمین یا رب!
محمد یاسین جہازی


























