مرزا بیدل کا واقعہ
جزاك الله که چشم باز کردی
اس موقع پر حضرت حکیم الامت مولانا تھانوی رحمۃ اللہ علیہ نے ایک حکایت جو آپ نے اپنے ایک وعظ میں بیان فرمائی تھی وہ نقل کی جاتی ہے۔ یہ حکایت حضرت اقدس نے اپنے وعظ ”آداب التبلیغ“ میں اس طرح بیان فرمائی تھی:
”شاید آپ سوچتے ہوں گے کہ ہمارے گناہوں سے کس کو آزار پہنچتا ہے؟ تو آپ ایک حکایت سے اس کا اندازہ کر لیجیے۔ مرزا بیدل شاعر دہلوی کی حکایت ہے کہ ان کے اشعار تصوف کا رنگ لیے ہوئے تھے۔ کسی ایرانی نے ان کے اشعار کو دیکھ کر پسند کیا اور ان کو بزرگ سمجھ کر سفر کر کے ان کے پاس دہلی آیا۔ جب ان کے پاس پہنچا تو اتفاق سے مرزا بیدل شاعر حجام سے داڑھی منڈوا رہے تھے۔ اس کو یہ دیکھ کر غصہ آ گیا اور جھنجھلا کر اس نے پوچھا: آغا ریش می تراشی؟ شاعر نے جواب دیا: آرے ریش می تراشم ولے دلے کسے نمی خراشم۔ (یعنی میں داڑھی مونڈتا ہوں مگر کسی کا دل نہیں دکھاتا)۔
وہ بیچارہ مخلص تھا، اس نے آزادانہ جواب دیا: آرے دلِ رسول اللہ صلی اللہ علیہ وسلم می تراشی! شاعر نے تو عرفی کے تصوف کے طور پر جواب دیا تھا کہ ”دلے کسے نمی خراشم“، ایرانی نے جواب دیا: ظالم! تو تو سب سے بڑے دل کو چھیل رہا ہے اور دعویٰ کرتا ہے کہ ”دلے کسے نمی خراشم“۔ بلے دلِ رسول اللہ صلی اللہ علیہ وسلم می تراشی! تم یہ داڑھی پر استرا نہیں پھیر رہے ہو بلکہ حضور صلی اللہ علیہ وسلم کے دل پر چھری چلا رہے ہو۔ حضور صلی اللہ علیہ وسلم کی خدمت میں جب اعمال پیش ہوتے ہیں اور آپ کو معلوم ہوتا ہے کہ میری امت کا ایک شخص یہ حرکت کرتا ہے، کیا اس سے آپ کا دل نہیں دکھتا؟ اور کیا آپ کا دل دکھانا چھوٹی بات ہے؟ آپ کا قلب تو سید القلوب ہے۔ جب تم سید القلوب کو تکلیف دیتے ہو پھر یہ دعویٰ کیسے کرتے ہو کہ ہم کسی کا دل نہیں دکھاتے ہیں۔
یہ سن کر مرزا بیدل کی آنکھ کھلی اور چیخ مار کر بیہوش ہو گیا۔ ہوش میں آیا تو توبہ کی اور بزبانِ حال یا قال یہ کہتا تھا:
جزاك الله که چشم باز کردی
مرا با جانِ جاں ہمراز کردی
(یعنی میں تو اندھا تھا۔ میری کبھی ادھر نظر ہی نہیں گئی کہ مجھ سے اتنے بڑے قلب کو ایذا ہو رہی ہے۔ یہاں تک میرے ذہن کی رسائی ہی نہیں ہوئی۔ تو نے میری آنکھیں کھول دیں، خدا تجھ کو اس کی جزا دے)۔“
یہ حکایت بیان فرما کر حضرت رحمۃ اللہ علیہ نے فرمایا: ”اب اس حکایت سے سمجھ لیجیے کہ جب آپ سے کوئی امر غیر شرعی سرزد ہوگا، حضور صلی اللہ علیہ وسلم کو اس سے آزار ہوگا یا نہیں؟“
(تعلیمی درس قرآن، جلد 14. ص/90)
