شاہین ادارہ جات بیدر کے زیرِ اہتمام27 / جنوری سے کرناٹک کے 20 شہروں میں تعلیمی بیداری کارواں کا آغاز
بیدر، 15 جنوری (پریس نوٹ):
ریاستِ کرناٹک میں دینی و عصری تعلیم کے مؤثر امتزاج، تعلیمی پسماندگی کے خاتمے اور نوجوان نسل کے محفوظ و روشن مستقبل کو یقینی بنانے کے مقصد سے شاہین ادارہ جات، بیدر کے زیرِ اہتمام ایک ہمہ جہت تعلیمی بیداری کارواں منعقد کیا جا رہا ہے۔ یہ تعلیمی کارواں 27 جنوری 2026ء سے 15 فروری 2026ء تک ریاست کے 20 مختلف شہروں میں منعقد ہوگا، جس میں مدارس، اسکولوں، والدین، اساتذہ اور سماجی ذمہ داران کی بھرپور شرکت متوقع ہے۔ اس تعلیمی مہم کا خصوصی ہدف فارغینِ مدارس، ڈراپ آؤٹ طلبہ و طالبات، نامکمل حفاظ اور وہ بچے ہیں جو کسی وجہ سے نہ اسکول اور نہ ہی مدرسہ کی تعلیم جاری رکھ سکے یا کبھی کسی تعلیمی ادارے سے وابستہ ہی نہ ہو پائے ہوں۔ منتظمین کے مطابق اس کارواں کے ذریعے ایسے طلبہ کو دوبارہ تعلیمی دھارے سے جوڑنے اور انہیں باوقار مستقبل کی سمت رہنمائی فراہم کرنے کی سنجیدہ کوشش کی جا رہی ہے۔ تعلیمی بیداری کارواں کے دوران اسکالرشپ پروگرام،ایجوکیشنل گائیڈنس، ڈراپ آؤٹ طلبہ کی تعداد میں کمی، دینیات پلس اور مدرسہ پلس کا قیام، دینی و عصری تعلیم کا عملی امتزاج، تعلیم کے ساتھ تربیت سازی، مدرسہ یا اسکول میں اکیڈمک انٹینسیو کیئر یونٹ (AICU) کا قیام، مدرسہ فارغین کو عصری تعلیم سے جوڑنے کی عملی رہنمائی، ہاسٹل سسٹم کی اہمیت پر آگاہی اور مسجد اسٹڈی سرکل کے قیام جیسے اہم اور عصری تقاضوں سے ہم آہنگ موضوعات پر تفصیلی رہنمائی فراہم کی جائے گی۔اس مہم کی ایک نمایاں خصوصیت 10 تا 11 سال کے کم عمر حفاظ کے لیے متعارف کرایا جانے والا عالمیت انٹیگریٹیڈ 6 سالہ کورس ہے، جس کے تحت 25 طلبہ کو مفت داخلہ دیا جائے گا۔ اس اقدام کا مقصد یہ ہے کہ ابتدائی عمر ہی سے حفاظِ کرام کو مضبوط دینی بنیاد کے ساتھ عصری تعلیم سے بھی جوڑا جائے تاکہ وہ مستقبل میں معاشرے کے باصلاحیت، باکردار اور خود کفیل شہری بن سکیں۔ تعلیمی کارواں کے مؤثر اور منظم انعقاد کے لیے ریاستِ کرناٹک کو مختلف زونز میں تقسیم کیا گیا ہے۔ زون 1 میں بیدر، یادگیر، گلبرگہ اور رائچور شامل ہیں، جہاں رابطہ ذمہ داری اسماء شاہین کے سپرد ہے (موبائل: 6364384394)۔ زون 2 میں بیجاپور، باگلکوٹ اور بلگاوی شامل ہیں، جن کے لیے محمد محی الدین رابطہ ذمہ دار ہیں۔(موبائل:7349235958)۔ زون 3 میں ہبلی، شمالی کنڑا، گدگ اور کوپل شامل ہیں، جن کی نگرانی صبا کر رہی ہیں (موبائل: 9353704415)۔ زون 4 میں ہاویری، بلاری اور وجے نگر شامل ہیں، جہاں نیہا ذمہ دار ہیں (موبائل:8147191997)۔ جبکہ زون 5 میں بنگلور، ٹمکور، شِموگہ، ہاسن، چکمگلور، چتردرگہ، میسور اور داونگیرے شامل ہیں، جن کی ذمہ داری ماریہ کے سپرد ہے (موبائل: 9182579002)۔ شاہین ادارہ جات کی جانب سے ائمۂ مساجد، ذمہ دارانِ مدارس، اسکول انتظامیہ، سماجی کارکنان اور والدین سے پُرزور اپیل کی گئی ہے کہ وہ اپنے اپنے شہر، مدرسہ یا اسکول میں اس تعلیمی بیداری کارواں کے انعقاد کے لیے متعلقہ زونل ذمہ داران سے رابطہ کریں اور اس اصلاحی و تعلیمی تحریک کا حصہ بنیں۔ منتظمین کا کہنا ہے کہ یہ کارواں محض ایک تعلیمی پروگرام نہیں بلکہ دینی تشخص کے تحفظ کے ساتھ نئی نسل کو عصری تقاضوں سے ہم آہنگ کرنے کی ایک سنجیدہ، منظم اور دیرپا تعلیمی تحریک ہے، جو مستقبل میں ریاستِ کرناٹک میں تعلیمی بیداری، فکری استحکام اور سماجی ترقی کی مضبوط بنیاد ثابت ہو سکتی ہے۔
