ازقلم افتخار حسین احسن
خدا کے سامنے سر کو جھکاؤ عید قرباں ہے
محبت بندگی سب کو سکھاؤ عید قرباں ہے
خلوص وپیار کا نغمہ سناؤ عید قرباں ہے
گلے دشمن کو بھی اپنے لگاؤ عید قرباں ہے
خلیل اللہ کی سنت سے جو بھی دور ہیں اب تک
انہیں بھی جذبئہ قرباں دلاؤ عید قرباں ہے
غریبوں بے کسوں کو آج اپنے گھر بلاؤ تم
محبت سے انہیں کھانا کھلاؤ عید قرباں ہے
کدورت اور نفرت کی بھی قربانی ضروری ہے
گلے شکوے جو دل میں ہیں بھلاؤ عید قرباں ہے
ریا ومکر سے بچ کر کرو ہر اک عمل یارو
رضاۓ رب کے آگے سر جھکاؤ عید قرباں ہے
ادھوری عید لگتی ہے عزیزوں کے بنا احسن
جو ہیں پردیس میں ان کو بلاؤ عید قرباں ہے
