سیکشن 4.4: کھیل کے ذریعے سیکھنا – گفتگو، کہانیاں، کھلونے، موسیقی، آرٹ اور کرافٹچھوٹے بچوں کے لیے کلاس رومز متحرک اور زندگی سے بھرپور ہوتے ہیں۔ بچے کئی طریقوں سے سیکھنے سے لطف اندوز ہوتے ہیں – بات چیت، سننا، کھلونوں کا استعمال، مواد کے ساتھ کام کرنا، پینٹنگ اور ڈرائنگ، گانا، ناچنا، بھاگنا اور کودنا۔ اساتذہ کے طور پر، ہم اپنے بچوں کے ساتھ کام کرنے کے لیے ان تمام طریقوں کا استعمال کرتے ہیں۔4.4.1 گفتگو (Conversations)زبان وہ ذریعہ ہے جس کے ذریعے بچے اپنے آپ سے اور دوسروں سے بات کرتے ہیں، اور یہ الفاظ ہی ہیں جن کی مدد سے وہ اپنی حقیقت کو سمجھنا اور اسے بنانا شروع کرتے ہیں۔ زبان کو واضح اور مدلل طریقے سے سمجھنے اور استعمال کرنے کی صلاحیت سیکھنے کے لیے ضروری ہے۔> گفتگو بچوں کی لوگوں اور اپنے ارد گرد کی چیزوں سے جڑنے کی صلاحیت کے لیے بہت اہم ہے۔ کلاس روم میں بچوں کے ساتھ مسلسل گفتگو سے اعتماد کے تعلقات قائم کرنے میں مدد ملتی ہے۔کلاس روم میں گفتگو دو قسم کی ہو سکتی ہے: a. آزادانہ گفتگو (Free conversations): آزادانہ گفتگو کے دوران، استاد کچھ بچوں کو اپنے گرد اکٹھا کرتا ہے اور انہیں دن کے دوران پیش آنے والی دلچسپ باتوں، اسکول کے راستے کی باتوں یا کسی بھی ایسی معلومات کے بارے میں بات کرنے کی اجازت دیتا ہے جو وہ شیئر کرنا چاہتے ہیں۔ استاد کا کام یہ ہے کہ وہ بچوں کو آسان سوالات کے ذریعے ابھارے جو ان کے تجربات کے بارے میں بات کرنے میں ان کی مدد کریں۔ b. منظم گفتگو (Structured conversations): منظم گفتگو اساتذہ کی طرف سے منصوبہ بند اور منظم کی جاتی ہے۔ یہ عام طور پر صبح کے وقت ہوتی ہے تاکہ بچوں کو ایک ساتھ جمع کیا جا سکے اور کسی ایک موضوع پر مل کر سوچا جا سکے۔ موضوعات اکثر بچوں کی روزمرہ کی زندگی کے واقعات اور ان کے احساسات کے بارے میں ہوتے ہیں۔جب تمام بچے استاد کے ساتھ دائرے میں بیٹھ کر بات کرتے ہیں تو اسے سرکل ٹائم (Circle Time) کہا جاتا ہے۔ بچے دائرے میں بیٹھنے کا لطف اٹھاتے ہیں اور ان میں ایک ساتھ ہونے کا احساس پیدا ہوتا ہے، اور استاد اس دوران ہر بچے کو دیکھ سکتا ہے۔ ہر روز سرکل ٹائم کا ایک سیشن ہونا اچھا ہے۔جب کسی مخصوص موضوع کا انتخاب کیا جاتا ہے، تو ایک توجہ مرکز ہوتی ہے جو بچوں کی زبان، معلومات اور اس موضوع کی سمجھ کو بڑھانے میں مدد کرتی ہے۔کسی مخصوص موضوع (مثلاً سبزیوں) کے ارد گرد گفتگو حقیقی اشیاء کا استعمال کرتے ہوئے کی جا سکتی ہے۔ مثال کے طور پر، سبزیوں کے بارے میں بات کرتے ہوئے، اصلی سبزیوں کا استعمال کیا جا سکتا ہے تاکہ بچے انہیں دیکھ سکیں، محسوس کر سکیں، ان کی شکل، رنگ، بناوٹ کے بارے میں بات کر سکیں اور انہیں چکھ بھی سکیں۔ استاد مزید وضاحت کے لیے پکچر کارڈز کا استعمال بھی کر سکتا ہے اور سبزیوں کے ارد گرد ایک کہانی بھی بنا سکتا ہے۔ایک اور امکان یہ ہے کہ استاد اس وقت چھوٹے تجربات کر کے دکھائے، جیسے دائرے کے درمیان میں پانی کا پیالہ رکھنا اور اس میں چھوٹی اشیاء ڈال کر دیکھنا کہ کیا ڈوبتا ہے اور کیا تیرتا ہے۔ اس سے بچوں کو اس بارے میں بات کرنے میں مدد ملتی ہے کہ ایسا کیوں ہوگا اور اشیاء کی خصوصیات کے بارے میں اندازہ لگانے میں مدد ملتی ہے۔”ہاں” اور "ناں” کے جوابات والے سوالات اس وقت زیادہ فائدے مند نہیں ہوتے۔ ایسے سوالات مفید ہیں جو بچوں کو بولنے اور مزید الفاظ اور جملے استعمال کرتے ہوئے کسی چیز کی وضاحت کرنے پر ابھارتے ہیں۔> غلط جواب دینے پر بچوں کو کبھی ڈانٹنا یا ملامت نہیں کرنی چاہیے۔ تمام بچوں کو بغیر کسی تنقید (ججمنٹ) کے حصہ لینے اور اپنے خیالات کا اظہار کرنے کے مساوی مواقع ملنے چاہئیں۔استاد کی آواز 4.4A (Teacher’s Voice 4.4A)سرکل ٹائم کے دوران رہنمائی شدہ گفتگو (Guided Conversation during Circle Time)میں ٹائیگر ریزرو کے بفر زون میں واقع ایک اسکول میں پڑھاتا ہوں۔ تقریباً 9 بچے، جن کی عمریں 3 سے 6 سال ہیں، باقاعدگی سے میری کلاس میں آتے ہیں۔ سرکل ٹائم کے لیے، میں عام طور پر ان کے لیے دلچسپ موضوع کا انتخاب کرتا ہوں، جیسے جانور۔ چونکہ میرے گاؤں میں اکثر خاندانوں کے پاس مویشی ہیں، اس لیے میرے تمام بچے جانوروں کے ارد گرد رہنے کے عادی ہیں، خاص طور پر کتے، چوہے، بکریاں، سور، مینڈک، مچھلی اور بتخیں۔ ان کے لیے جنگل سے شیر، ہاتھی، ریچھ یا چیتے کے بارے میں سننا اور بعض اوقات دیکھنا بھی غیر معمولی نہیں ہے۔ میں ضروری مواد تیار کرتا ہوں جیسے فلیش کارڈز یا پچھلے دن انہوں نے جو دیکھا یا سنا ہو سکتا ہے اس سے متعلق ایک مختصر ویڈیو شارٹ لسٹ کرتا ہوں۔ دن کے وقت، میں خود ان سے ایک دائرے میں بیٹھنے کی درخواست کر کے شروعات کرتا ہوں، تاکہ ہم سب ایک دوسرے کو دیکھ سکیں۔(تصویر میں: شیر، ہاتھی اور بکری کے فلیش کارڈز)تصویر 4.4A: جانوروں کے فلیش کارڈز (TIGER, ELEPHANT, GOAT)پھر، ایک ایک کر کے، میں ان کے مواد کے بارے میں بات کرنے کے لیے فلیش کارڈز اٹھاتا ہوں۔ مثال کے طور پر، ہم نے جو فلیش کارڈ اٹھایا وہ شیر کا تھا – لہذا ہم نے اس طرح بات کرنا شروع کی: کیا آپ جانتے ہیں کہ یہ کون سا جانور ہے؟ کیا آپ نے اسے کبھی دیکھا ہے؟ یہ جانور کیسے بولتا ہے!؟ یہ کیا کھاتا ہے؟ یہ کہاں رہتا ہے؟ اور اسی طرح۔ میں تمام بچوں کو جواب دینے کے لیے حوصلہ افزائی کرتا ہوں اور بغیر کسی تنقید کے تمام جوابات کو سراہتا ہوں۔ مقصد انہیں زیادہ سے زیادہ بات کرنے کی ترغیب دینا ہے۔ بعض اوقات، میں ہر بچے کو ایک کارڈ دیتا ہوں اور ہم رول پلے (سوانگ/ڈرامہ) کرتے ہیں۔ ایک شیر بن جائے گا؛ دوسرا بکری بن جائے گا اور ہم سب مل کر جانوروں کی مختلف آوازوں کا شور مچائیں گے! اس میں بہت مزہ آتا ہے! سرکل ٹائم کے اختتام تک، میں اس بات کو یقینی بناتا ہوں کہ بچے جانوروں کے مختلف ناموں، وہ کیسے دکھتے ہیں، کیسے چلتے ہیں، کیا آواز نکالتے ہیں اور کہاں رہتے ہیں، اس سے واقف ہوں۔اگلے دن کی گفتگو میں، میں ان جانوروں کو شامل کروں گا جو ہمارے ارد گرد نہیں ہیں، جیسے اونٹ، اور اس پر بات کروں گا کہ وہ ہمارے ارد گرد کیوں نہیں رہتے۔ 4.4A: دکھاؤ اور بتاؤ سیشنز (Show and Tell sessions)’دکھاؤ اور بتاؤ’ (Show and Tell) کا تصور ہندوستان اور دنیا بھر میں عوامی بول چال (Public Speaking) اور سننے کی مہارتوں کو فروغ دینے اور شروعاتی سالوں میں بچوں کے درمیان بات چیت اور تعامل کو فروغ دینے میں ایک بڑی کامیابی رہا ہے۔ بنیادی مرحلے (Foundational Stage) کے تمام بچوں کو ہفتے میں کم از کم ایک بار ایک پرلطف ‘دکھاؤ اور بتاؤ’ سیشن میں حصہ لینے کا موقع (اپنے اساتذہ کے ساتھ) ملے گا۔اس میں بچے اور اساتذہ کھلونے، گیمز، خاندانی تصاویر، پھول، کتابیں، اصل کہانیاں، اور ذاتی واقعات (مثلاً خاندانی ارکان، دوستوں، تہواروں، تجربات، چھٹیوں، اس ہفتے کے پسندیدہ اسباق، پسندیدہ مضامین کے بارے میں) لائیں گے اور کلاس کے سامنے ان کے بارے میں چند منٹ بولیں گے۔ یہ ‘دکھاؤ اور بتاؤ’ سیشنز شروع میں بچوں کی مادری زبانوں میں ہوں گے، لیکن بالآخر ان میں وہ دوسری زبانیں بھی شامل ہوں گی جو بچے سیکھ رہے ہیں۔بچے اور اساتذہ سیشنز کو مزید پرلطف اور انٹرایکٹو بنانے کے لیے ہر پیشکش (Presentation) کے دوران یا آخر میں سوالات بھی پوچھیں گے اور تبصرے بھی کریں گے۔ اساتذہ مثال قائم کرنے کے لیے اپنی پیشکشوں سے شروعات کر سکتے ہیں۔ انہیں بچوں کے ساتھ صحیح معنوں میں رشتہ قائم کرنے کے لیے اور بچوں کے ایک دوسرے کے ساتھ تعلق کو مضبوط بنانے کے لیے بحث کی حوصلہ افزائی کرتے ہوئے شروع سے آخر تک حصہ لینا چاہیے۔
این سی ایف کا سیکشن نمبر 4
مترجم: محمد یاسین جہازی
