محمد جنید الرحمن۔۔۔
دہلی
معارف میں ستمبر میں سیرت النبی کے ترجمہ کے سلسلے میں ایک مراسلہ شائع ہوا ہے، اور ایڈیٹر صاحب کی طرف سے اس کا جواب بھی۔ اس ضمن میں ایک سوال یہ ہے کہ دارالمصنفین کی کتابوں کا کون سا حق باقی ہے، آج برصغیر کے دس نہیں بیسیوں ناشرین چند کتابوں کے سوا اس ادارہ کی تمام مطبوعات چھاپ رہے ہیں اور ان پر اب تک کوئی پابندی نہیں لگی ہے۔ خود دارالمصنفین نے دیگر مصنفین اور اپنے قدیم ذمہ داروں کی دوسرے اداروں سے چھپی ہوئی مطبوعات چھاپ لیں اور ان کے قدیم ناشرین یا وارثان مصنفین سے کوئی اجازت طلب نہیں کی، بہت سی چیزیں دارالمصنفین سے نہیں بلکہ مطبع معارف سے ان کے مصنفین کے خرچ پر چھپی تھیں لیکن ان میں سے بھی بہت سی کتابوں کو دارالمصنفین نے اپنا حق سمجھ کر دوبارہ چھاپ دیا۔ اس کا کیا جواب ہے۔
