چترا کے بڑگاؤں میں مرحوم محمد امروز انصاری کے اہل خانہ سے جمعیۃ کے وفد کی ملاقات، غیر جانبدارانہ جانچ اور امن برقرار رکھنے کی اپیل*رانچی/چترا، 5 اگست:جمعیۃ علماء ہند جھارکھنڈ کے جنرل سکریٹری الحاج شاہ عمیر صاحب کی ہدایت پر جمعیۃ علماء جھارکھنڈ کا ایک وفد بدھ کے روز ضلع چترا کے بڑگاؤں پہنچا۔ وفد نے مبینہ ہجومی تشدد (ماب لنچنگ) میں جاں بحق ہونے والے محمد امروز انصاریولد سلطان انصاری کے اہل خانہ سے ملاقات کرکے اظہارِ تعزیت کیا اور واقعہ کی مکمل معلومات حاصل کیں۔ وفد کی قیادت جمعیت علماء چترا کے قاری ممتاز نے کی، جبکہ ان کے ہمراہ مولانا ارشاڈ، مولانا مبین اور دیگر ذمہ داران موجود تھے۔ وفد نے مرحوم کے اہل خانہ سے تفصیلی گفتگو کی، دھرنا دے رہے لوگوں سے بھی ملاقات کی اور اس کے علاوہ متعلقہ تھانہ انچارج، انچل افسر (سی او)اور ایس ڈی پی او سے ملاقات کرکے پورے معاملے پر تبادلۂ خیال کیا۔جمعیۃ علماء جھارکھنڈ کے جنرل سکریٹری الحاج شاہ عمیر نے کہا کہ کسی بھی شخص کو قانون اپنے ہاتھ میں لینے کی اجازت نہیں دی جا سکتی۔ ماب لنچنگ جیسے واقعات کسی بھی صورت میں قابل قبول نہیں ہیں۔ اگر کسی پر کوئی الزام ہے تو اس کے خلاف کارروائی قانون کے دائرے میں ہونی چاہیے، نہ کہ ہجوم کے تشدد کے ذریعے۔انہوں نے ضلعی انتظامیہ سے اپیل کی کہ علاقے میں امن و امان اور بھائی چارہ برقرار رکھا جائے، واقعہ کی غیر جانبدارانہ اور شفاف جانچ کرائی جائیں اور جو بھی قصوروار ہوں، انہیں قانون کے مطابق سخت سزا دی جائے۔ نیز اس واقعہ میں ملوث تمام ملزمان کو فوری گرفتار کیا جائے۔جمعیۃ علماء جھارکھنڈ نے بتایا کہ وفد کی جانب سے تیار کی جانے والی تحقیقی رپورٹ جلد ہی جمعیۃ علماء ہند کی مرکزی قیادت کو ارسال کی جائے گی تاکہ آئندہ ضروری اقدامات کیے جا سکیں۔ وفد کے سربراہ قاری ممتاز نے تمام فریقین سے امن، صبر و تحمل اور قانون کی پاسداری کی اپیل کرتے ہوئے کہا کہ سماجی ہم آہنگی اور بھائی چارے کو برقرار رکھنا ہم سب کی مشترکہ ذمہ داری ہے۔
