رپورٹ
28 مئی 2026ء بروز جمعرات، عید الاضحیٰ کے مبارک دن جہاز قطعہ گڈا، جھارکھنڈ میں عید کی نماز ٹھیک صبح 7 بج کر 20 منٹ پر ادا کی گئی۔ نماز عید کے بعد امامِ جمعہ، حافظ شفیق صاحب جہازی نے خطبۂ عید ارشاد فرمایا۔
اس سے قبل مولانا محمد یاسین جہازی قاسمی نے عید الاضحیٰ کی تاریخ اور اس کی عظمت پر مفصل روشنی ڈالی۔ انہوں نے بیان کیا کہ تقریباً 2200 سے 2300 قبل مسیح میں مبعوث ہونے والے جلیل القدر پیغمبر حضرت ابراہیم علیہ الصلوٰۃ والسلام کے اپنے لاڈلے فرزند حضرت اسماعیل علیہ الصلوٰۃ والسلام کو اللہ کی راہ میں قربان کرنے کے عظیم واقعہ سے اس عبادت کا آغاز ہوا۔ آج سن 2026ء میں اس مقدس عبادت کو تقریباً 4300 سال گزر چکے ہیں، مگر ملتِ ابراہیمی کی یہ عظیم وراثت آج بھی اسی شان کے ساتھ قائم ہے اور نبی کریم صلی اللہ علیہ وسلم کی تعلیمات کے مطابق ادا کی جا رہی ہے۔
مولانا نے اپنے خطاب میں مزید فرمایا کہ سرورِ کائنات حضرت محمد عربی صلی اللہ علیہ وسلم نے اپنی پوری حیاتِ طیبہ میں قربانی کا خاص اہتمام فرمایا۔ جب بھی آپ صلی اللہ علیہ وسلم مدینہ منورہ میں قیام فرماتے توآپ دو مینڈھوں کی قربانی پیش کرتے۔ مزید یہ کہ 10 ذی الحجہ سن 10 ہجری، مطابق 7 مارچ 632ء بروز سنیچر، حجۃ الوداع کے موقع پر آپ صلی اللہ علیہ وسلم نے اپنی طرف سے 100 اونٹوں کی قربانی دی، جن میں سے 63 اونٹ اپنے دستِ مبارک سے ذبح فرمائے اور بقیہ 37 اونٹ حضرت علی رضی اللہ عنہ نے ذبح کیے۔ اسی طرح ازواجِ مطہرات کی طرف سے گائے کی قربانی بھی پیش فرمائی گئی۔
سیرتِ نبوی صلی اللہ علیہ وسلم کے اس روشن پہلو کی طرف توجہ دلاتے ہوئے مولانا جہازی نے حاضرین کو ترغیب دی کہ وہ بھی اپنی طرف سے قربانی کرنے کے ساتھ ساتھ ایک قربانی نبی کریم صلی اللہ علیہ وسلم کی طرف سے کرنے کا اہتمام کریں۔ آخر میں انہوں نے تمام اہلِ اسلام کو عید کی دلی مبارکباد پیش کرتے ہوئے اپنا خطاب مکمل کیا۔
مولانا جہازی کے خطاب سے قبل مفتی محمد سفیان ظفر قاسمی نے بھی عوام سے خطاب کیا، جس میں انہوں نے قربانی کی فضیلت اور حضرت ابراہیم علیہ الصلوٰۃ والسلام کے اس عظیم عمل کو سنت قرار دیتے ہوئے اس کی اہمیت بیان کی۔ انہوں نے اپنے خطاب میں اس بات پر زور دیا کہ قربانی محض ایک رسم نہیں بلکہ خلوص اور تقویٰ کا مظہر ہے، لہٰذا مسلمانوں کو چاہیے کہ وہ دکھاوے اور نمود و نمائش سے بچتے ہوئے اخلاص کے ساتھ اللہ کی رضا کے لیے قربانی انجام دیں۔
جہازی میڈیا کی جانب سے تمام قارئین کو عید الاضحیٰ کی مبارکباد اور نیک تمنائیں ۔
آپ جہاں بھی رہیں، جیسے بھی رہیں، خوش و خرم اور آباد رہیں۔
