بتاریخ: 11 جون 2026
جمعیت علمائے بسنت رائے کے زیرِ اہتمام جاری ”گاؤں گاؤں نوجوانوں اور عوامی بیداری پروگرام“ کے سلسلے کی آٹھویں کڑی 11 جون 2026 بروز جمعرات گاؤں لیتھا میں نہایت کامیابی، نظم و ضبط اور عوامی دلچسپی کے ساتھ منعقد ہوئی۔ پروگرام کا مقصد عوام بالخصوص نوجوان نسل میں ایمان و عقیدہ کی بیداری، دینی شعور کی آبیاری اور مثبت فکری رجحانات کو فروغ دینا ہے۔
پروگرام کا آغاز مولانا عبدا لجبار صاحب (امام جامع مسجد لیتھا) کی تلاوتِ کلامِ پاک سے ہوا، جبکہ قاری ضیاء الحق صاحب (مہتمم مدرسہ دھپرا) نے نعتِ رسولِ مقبول صلی اللہ علیہ وسلم پیش کرکے محفل کو روحانی کیفیت سے معطر کردیا۔ ابتدا ہی سے حاضرین میں غیر معمولی سنجیدگی اور دلچسپی دیکھی گئی، جس نے پورے پروگرام کو ایک مؤثر اور پُراثر ماحول عطا کیا۔
پروگرام کے پہلے اہم عنوان ” اپنے ایمان کا محاسبہ کیجیے“ پر مفتی محمد زاہد امان قاسمی (ناظم جمعیت علمائے بسنت رائے و بانی و مہتمم جامعہ خدیجۃ الکبریٰ) نے نہایت فکر انگیز اور مؤثر پریزنٹیشن پیش کی۔ انہوں نے مختلف سوالات، عملی مشقوں اور روزمرہ مثالوں کے ذریعے حاضرین کے ایمان و عقیدے سے متعلق معلومات کا جائزہ لیا اور اس حقیقت کی نشاندہی کی کہ مسلمانوں کی ایک بڑی تعداد اپنے بنیادی اسلامی معلومات سے مکمل واقفیت نہیں رکھتی، جس کی وجہ سے فکری اور اعتقادی کمزوریاں جنم لے رہی ہیں۔ انہوں نے ایمان کی حفاظت اور عقائد کی درستی کو ہر مسلمان کی بنیادی ذمہ داری قرار دیا۔
اسی موقع پر گاؤں لیتھا کے دینی حالات و احوال پر مشتمل ایک مختصر جائزہ بھی پیش کیا گیا۔ بتایا گیا کہ تقریباً ایک ہزار مسلم آبادی پر مشتمل اس بستی میں دینی ضروریات کے لیے صرف ایک مسجد اور ایک مکتب موجود ہے۔ مسجد سے باقاعدہ طور پر تقریباً پچاس افراد وابستہ ہیں، جبکہ مکتب میں تقریباً ستر بچے تعلیم حاصل کر رہے ہیں۔ اسی طرح تبلیغی جماعت سے وابستہ افراد کی تعداد تقریباً پچیس ہے۔ ان اعداد و شمار کی روشنی میں اس امر پر زور دیا کہ گاؤں میں دینی شعور کو مزید مضبوط بنانے اور نئی نسل کو دین سے جوڑنے کے لیے مسلسل اجتماعی کوششوں کی ضرورت ہے۔
اس کے بعد سات بنیادی عقائدِ کے موضوع پر مولانا شمس تبریز صاحب (امام جامع مسجد کیتھ پورہ) نے نہایت مدلل اور عام فہم انداز میں پریزنٹیشن پیش کی۔ انہوں نے توحید، رسالت، ملائکہ، آسمانی کتابوں، آخرت، تقدیر اور عقیدہ ختمِ نبوت سمیت بنیادی اسلامی عقائد کی اہمیت پر روشنی ڈالتے ہوئے حاضرین کو صحیح عقیدہ سیکھنے اور اس پر مضبوطی سے قائم رہنے کی تلقین کی، بار بار کہلوا کرکے یاد کرایا ، انہوں نے واضح کیا کہ عقیدہ ہی دین کی بنیاد ہے اور بنیاد کے کمزور ہونے کی صورت میں پوری دینی زندگی متاثر ہو جاتی ہے۔ ایک حسی مثال دیتے ہوئے کہا کہ جس طرح سے درخت کی جڑ کمزور ہو جائے تو شاخ ہرا بھرا نہیں رہ سکتا ہے ٹھیک اسی طرح سے عقیدہ کمروز ہو جائے تو اسلام کی جڑ جو ایمان ہے وہ کمزور ہو جائے گا ـ
بعد ازاں مفتی محمد نظام الدین قاسمی (صدر جمعیت علمائے بسنت رائے و بانی و مہتمم جامعۃ الہدی، جہاز قطعہ) نے ” ریل سے ریئل تک “ کے عنوان سے نوجوانوں کی فکری، تعلیمی اور عملی تربیت پر مبنی ایک مؤثر پریزنٹیشن پیش کی۔ انہوں نے نوجوانوں کو مخاطب کرتے ہوئے کہا کہ زندگی میں کامیابی کے لیے واضح مقصد، مضبوط ارادہ، وقت کی قدر اور مسلسل محنت بنیادی حیثیت رکھتے ہیں۔ انہوں نے مثالوں کے ذریعے سمجھایا کہ جس نوجوان کے پاس زندگی کا کوئی واضح ہدف نہیں ہوتا، وہ اپنا قیمتی وقت فضول مشاغل اور بے مقصد سرگرمیوں میں ضائع کر دیتا ہے۔
انہوں نے موجودہ دور کے نوجوانوں کو درپیش چیلنجز کا ذکر کرتے ہوئے کہا کہ سوشل میڈیا اور وقتی تفریحات میں گم ہونے کے بجائے تعلیم، کردار سازی، دینی وابستگی اور مثبت سوچ کو اپنی زندگی کا حصہ بنانا چاہیے۔ انہوں نے اس بات پر زور دیا کہ قوموں کا مستقبل نوجوانوں کے ہاتھ میں ہوتا ہے، اس لیے نوجوانوں کو اپنی صلاحیتوں کو تعمیری میدانوں میں استعمال کرنا چاہیے۔
پروگرام کو پروجیکٹر اور بصری پریزنٹیشنز کا مؤثر استعمال کیا گیا، جس سے حاضرین کو موضوعات کو بہتر انداز میں سمجھنے کا موقع ملا اور پروگرام کی افادیت میں مزید اضافہ ہوا۔
اختتامی مرحلے میں مفتی محمد نظام الدین قاسمی نے ذکرِ جہری کی مجلس قائم فرمائی، جس میں حاضرین نے نہایت خشوع و خضوع کے ساتھ شرکت کی۔ ذکر و اذکار کے بعد انہوں نے امتِ مسلمہ، نوجوان نسل، دینی اداروں، علاقے کے امن و استحکام اور ایمان و عقیدہ کی حفاظت کے لیے خصوصی دعا فرمائی۔ دعا کے روح پرور لمحات نے حاضرین کے دلوں پر گہرا اثر چھوڑا اور پورا ماحول رقت و خشیت سے بھر گیا۔
آئندہ کا پروگرام
جمعیت علمائے بسنت رائے کے ذمہ داران کے مطابق اس بیداری مہم کے آئندہ پروگرام درج ذیل مقامات پر منعقد ہوں گے:
– 16 جون 2026: جامع مسجد جمنی کولہ
– 17 جون 2026: ابراہیمی مسجد مدنی چک
– 18 جون 2026: نئی مسجد بسمبر چک
– 20 جون 2026: جامع مسجد سمری
یہ آٹھواں بیداری پروگرام اپنی علمی افادیت، فکری رہنمائی، روحانی تاثیر اور منظم اندازِ پیشکش کے اعتبار سے ایک کامیاب اور یادگار مرحلہ ثابت ہواـ
