محمد یاسین جہازی
حکومت کی جانب سے ہر چند سال بعد ملکی سطح پر تعلیمی جائزے کے حوالے سے ایک جامع رپورٹ اور تعلیمی پالیسی سامنے آتی ہے، جس میں عصری تقاضوں اور موجودہ دور کے بچوں کی نفسیات کے مطابق تدریسی طریقے اور رہنما اصول پیش کیے جاتے ہیں۔ یہ دستاویزات دراصل دنیا کے ممتاز اور انتہائی ماہرینِ تعلیم کے طویل تجربات، گہرے مشاہدات اور غور و فکر کا نچوڑ ہوتی ہیں۔ چنانچہ، اربابِ مدارس اور ذمہ دارانِ تعلیم کے لیے ضروری ہے کہ وہ ان رپورٹس کا گہرا مطالعہ کریں، ان کے تعمیری پہلوؤں سے فائدہ اٹھائیں اور اپنے اپنے اداروں کے مزاج و ماحول کی مناسبت سے، جہاں تک ممکن ہو، ان مفید فارمولوں کو نافذ العمل کرنے کی کوشش کریں۔اسی سلسلے میں قومی نصابی فریم ورک 2023 (NCF 2023) اور قومی تعلیمی پالیسی کے تحت ایک ایسے طالب علم کا خاکہ پیش کیا گیا ہے جس کی شخصیت کی ہمہ جہت اور متوازن ترقی (Holistic Development) ہوئی ہو۔ اس کے بنیادی نکات اور ان کا عملی مفہوم درج ذیل ہیں:A. Develop a scientific temperترجمہ: سائنسی مزاج اور تحقیقی نقطہ نظر پیدا کرنا۔مطلب: طلبہ میں یہ عادت ڈالنا کہ وہ سنی سنائی باتوں پر آنکھ بند کر کے یقین نہ کریں، بلکہ ہر معاملے میں حقیقت کی تلاش، ٹھوس دلیل اور منطق کو بنیاد بنائیں۔B. Develop creativity and innovation through artsترجمہ: فنونِ لطیفہ اور مختلف فنون کے ذریعے تخلیقی و اجتہادی صلاحیتوں کو فروغ دینا۔مطلب: خوش نویسی، تعمیراتی خاکے، دستکاری یا دیگر تعمیری فنون کے ذریعے بچوں کی سوچ کو وسعت دینا، تاکہ ان کے اندر نئی راہیں تلاش کرنے اور کچھ نیا کرنے کا حوصلہ پیدا ہو۔C. Develop excellent verbal and written communication capacitiesترجمہ: بولنے اور لکھنے کی بہترین مواصلاتی صلاحیتیں (Communication Skills) بیدار کرنا۔مطلب: طالب علم اس قابل بن سکے کہ وہ اپنے خیالات، نظریات اور دینی و علمی پیغامات کو زبان اور قلم دونوں کے ذریعے معاشرے کے سامنے انتہائی واضح، مؤثر اور دلنشین انداز میں پیش کر سکے۔D. Develop appropriate practices and habits to maintain a healthy body and mindترجمہ: صحت مند جسم اور پرسکون دماغ کو برقرار رکھنے کے لیے مناسب عادات و اطوار کی تربیت دینا۔مطلب: طلبہ کو ایسی عادات سکھانا (جیسے نظافت، متوازن غذا، مناسب ورزش اور ذہنی تناؤ سے دوری) جس سے ان کی جسمانی تندرستی اور ذہنی بیداری برقرار رہے۔E. Develop effective problem-solving and logical reasoning capacitiesترجمہ: مسائل کو حل کرنے اور منطقی استدلال (دلیل دینے) کی مؤثر استعداد پیدا کرنا۔مطلب: زندگی یا علمی میدان میں سامنے آنے والی پیچیدگیوں کو گھبرائے بغیر، عقل، حکمت اور صحیح اصولوں کے ساتھ حل کرنے کی صلاحیت پیدا کرنا۔F. Develop useful vocational skills and sensibilitiesترجمہ: مفید پیشہ ورانہ مہارتیں (Vocational Skills) اور معاشی سوجھ بوجھ پیدا کرنا۔مطلب: تعلیمی دور ہی میں طلبہ کو کسی نہ کسی ایسے ہنر یا تکنیکی کام سے روشناس کرانا جو مستقبل میں ان کے لیے باعزت روزگار کا ذریعہ بن سکے اور انہیں معاشرے پر بوجھ بننے کے بجائے ایک خود کفیل انسان بنائے۔G. Develop digital literacy and computational thinkingترجمہ: ڈیجیٹل خواندگی (کمپیوٹر و انٹرنیٹ کی سمجھ) اور حسابی و منظم سوچ کو فروغ دینا۔مطلب: موجودہ دور کے تقاضوں کے مطابق کمپیوٹر، انفارمیشن ٹیکنالوجی اور انٹرنیٹ کے مثبت و تعمیری استعمال کی مہارت دینا، تاکہ وہ دعوت و تبلیغ اور دیگر میدانوں میں پیچھے نہ رہیں۔H. Develop capacities for moral reasoning and ethical actionترجمہ: اخلاقی شعور اور بااخلاق عمل کی صلاحیتیں پروان چڑھانا۔مطلب: بچوں کے اندر ضمیر کی آواز اور سچی اخلاقیات کو اس طرح بیدار کرنا کہ وہ خود نیکی اور بدی، اور امانت و خیانت کے فرق کو سمجھیں اور زندگی بھر دیانت داری کا راستہ اختیار کریں۔I. Develop an in-depth understanding of Indian knowledge systemsترجمہ: ملکی علوم، تاریخ اور روایتی معلوماتی نظام کی گہری سمجھ پیدا کرنا۔مطلب: طلبہ کو ملک کے جغرافیہ، قدیم علمی تاریخ، روایات اور یہاں کے نظامِ زندگی سے واقف کرانا تاکہ وہ اپنے وطن کی جڑوں سے جڑے رہیں اور یہاں کے ماحول میں بہتر خدمات انجام دے سکیں۔J. Develop capacities and dispositions to be engaged with current affairsترجمہ: ملکی و عالمی حالاتِ حاضرہ سے باخبر رہنے کی صلاحیت اور رجحان پیدا کرنا۔مطلب: طلبہ میں یہ دلچسپی اور بیداری پیدا کرنا کہ وہ دنیا اور ملک کے سیاسی، سماجی اور تعلیمی حالات پر نظر رکھیں، اخبارات و مستند ذرائع کا مطالعہ کریں، تاکہ وہ اپنے دور کے چیلنجز کا صحیح ادراک کر سکیں۔
محمد یاسین جہازی
