اکیسویں صدی سے دیار حبیب صلی اللہ علیہ وسلم سے ہندستانی مسلمانوں کے روابط:پندرھویں قسط

محمد یاسین جہازی

تقدیس حرم کے لیے رواں جدوجہد، حرم میں حادثات کے واقعات پر اظہار رنج و الم

11 اپریل 1988 کو جمعیت علمائے ہند کا وفد سعودی عرب روانہ ہوا اور 22 اپریل 1988 کو واپس آیا۔ اس دوران وفد نے عمرہ ادا کیا، سعودی حکام اور 3 رمضان 1408ھ کو شاہ فہد سے ملاقات کی، جنہوں نے حرمین شریفین کے تحفظ کے سلسلے میں جمعیت کی خدمات کو سراہا۔ بعد ازاں 2 جولائی 1988 کو لندن میں منعقدہ تحفظِ حرم کانفرنس سے خطاب کرتے ہوئے حضرت مولانا سید اسعد مدنیؒ نے 1987 کے سانحہ حرم اور ایرانی حجاج کی کارروائیوں پر افسوس کا اظہار کیا۔

11،12 فروری 1989 کو مجلس منتظمہ کے اجلاس میں سعودی نمائندہ شیخ عبدالعزیز عمار نے جمعیت کے کردار کو سراہا، مولانا سید ارشد مدنی نے حرمین شریفین کی عظمت پر خطاب کیا، اور تقدسِ حرمین کے تحفظ، سعودی حکومت کے حج انتظامات اور حرمین کی توسیع کی تحسین میں قرارداد منظور کی گئی۔ اس کے بعد 11 جولائی 1989 کو حج کے دوران بم دھماکوں کے واقعہ کی جمعیت نے شدید مذمت کی اور اسے اسلام دشمن سازش قرار دیا۔

3 جون 1990 کی مجلس منتظمہ نے حج کے دوران امن برقرار رکھنے کے لیے سعودی حکومت کی پالیسی، حرمین شریفین کی توسیع اور 1987 کے ایرانی مظاہروں کے تناظر میں کیے گئے اقدامات کی حمایت کی۔ 26 مارچ 1992 کو شاہ فہد اور ولی عہد شہزادہ عبداللہ بن عبدالعزیز نے حضرت مولانا سید اسعد مدنی کو رمضان المبارک کی مبارک باد کے خصوصی پیغامات بھیجے۔

23 مئی 1994 کو منیٰ میں رمی جمرات کے دوران پیش آنے والے جان لیوا حادثہ پر 11،12 جون 1994 کی مجلس عاملہ نے اظہار افسوس کرتے ہوئے سعودی حکومت کے انتظامات کی تحسین کی اور حج کے انتظامات کسی بین الاقوامی ادارے کے سپرد کرنے کے مطالبات کو مسترد کیا۔ 26 مئی 1995 کو جمعیت نے ایران کی جانب سے حج کے دوران سیاسی مظاہروں کے اعلان کی مذمت کرتے ہوئے سعودی حفاظتی اقدامات کی تائید کی۔ 29 اکتوبر 1995 کو جمعیت کے پچیسویں اجلاس عام کے لیے امام حرم محمد بن عبداللہ السبیل نے تہنیتی پیغام بھیجا۔

12 نومبر 1996 کو چرخی دادری کے فضائی حادثہ پر جمعیت نے تعزیت کا اظہار کیا، شاہ فہد اور سعودی سفیر کو تعزیتی پیغامات بھیجے اور ایک وفد کو جائے حادثہ روانہ کیا۔ 15 اپریل 1997 کو منیٰ کے خیموں میں آتش زدگی کے المناک حادثہ کے بعد 17 مئی 1997 کی مجلس عاملہ نے شہدا کے لیے دعائے مغفرت کی، سعودی حکومت کی امدادی کارروائیوں کو سراہا اور حکومت ہند کے اقدامات کی بھی تحسین کی۔

7 مارچ 1999 کی مجلس عاملہ میں سعودی حکومت کی نئی حج پالیسی، خصوصاً ویکسینیشن کی شرط، پر غور کیا گیا اور احتجاج کے مختلف طریقوں پر تبادلہ خیال ہوا۔ 29،30 جولائی 1999 کو سعودی عرب کے ممتاز عالم شیخ عبدالعزیز بن بازؒ کے انتقال پر تعزیتی قرارداد منظور کی گئی۔
(جاری)۔۔۔۔۔۔

@all