سولھویں قسط
محمد یاسین جہازی
ممالک اسلام سے خارجہ پالیسی اختیار کرنے اور مسلک دیوبند کے متعلق موقف تبدیل کرنے کی ضرورت
2 جولائی 2000 کو اسلامی ماحول میں عصری تعلیم کانفرنس میں سعودی سفیر عبدالرحمن الناصر العویلی نے سعودی عرب کو عالم اسلام کا قلب قرار دیتے ہوئے جمعیت کی تعلیمی خدمات کی تعریف کی۔ اسی سال 23 اکتوبر 2000 کے احتجاجی مظاہرہ میں اسرائیل کے خلاف سعودی عرب کے موقف اور فلسطینیوں کی حمایت کی تائید کی گئی۔
2،3 مئی 2001 کی تحفظ سنت کانفرنس میں اگرچہ حرمین شریفین کی خدمت، حج انتظامات اور سعودی خدمات کو سراہا گیا، لیکن الجامعۃ الاسلامیہ مدینہ منورہ اور بعض سرکاری مطبوعات کے ذریعے مسلک دیوبند اور ائمہ اربعہ کے خلاف لٹریچر کی اشاعت پر شدید تشویش ظاہر کرتے ہوئے حکومت سعودی عرب سے اصلاح کا مطالبہ کیا گیا۔
12 جنوری 2006 کے منیٰ حادثہ پر جمعیت نے 13 جنوری 2006 کو افسوس کا اظہار کرتے ہوئے حجاج کی بے احتیاطی کو بھی ایک سبب قرار دیا۔ اسی طرح یکم فروری 2006 کی مجلس عاملہ نے 30 ستمبر 2005 کو ڈنمارک کے اخبار میں شائع ہونے والے گستاخانہ خاکوں کی مذمت کرتے ہوئے سعودی عرب کی جانب سے سفارتی احتجاج اور بائیکاٹ کی تحسین کی۔
8 فروری 2007 کو سعودی فرمانروا شاہ عبداللہ کی کوشش سے مکہ معاہدہ طے پایا، جس کی 14 فروری 2007 کی مجلس عاملہ نے تحسین کی اور فلسطینی اتحاد کی حمایت کی۔ 6 نومبر 2012 کو میانمار کے مسلمانوں کے مسئلہ پر جمعیت نے سعودی عرب سمیت مختلف مسلم ممالک کے سربراہوں کو خطوط روانہ کیے۔
14 اگست 2013 کے رباعہ قتل عام کے بعد سعودی حکومت کی مصری فوج کی حمایت پر جمعیت نے 25،26 مئی 2014 کی مجلس منتظمہ میں افسوس کا اظہار کرتے ہوئے سعودی حکومت سے اپنی پالیسی پر نظرثانی اور اخوان المسلمون کے معاملہ میں مفاہمت کی اپیل کی، اگرچہ حرمین شریفین کی خدمت اور حج انتظامات کو قابل تحسین بھی قرار دیا۔
12 نومبر 2016 کو اجمیر میں جمعیت کے تینتیسویں اجلاس عام کے عالمی نعتیہ مشاعرہ میں سعودی عرب کے معروف شاعر محمد بن عمر سالم العید روس نے شرکت کی اور اتحادِ امت، محبت، امن اور وطن سے وفاداری پر مبنی عربی و اردو کلام پیش کیا۔
آخر میں 30 جون 2018 کی مجلس عاملہ میں سعودی عرب میں جاری جدید اصلاحات کا جائزہ لینے کے لیے ایک کمیٹی تشکیل دی گئی، جبکہ 22 اکتوبر 2018 کی مجلس عاملہ نے سعودی حکومت کے مبینہ غیر شرعی اقدامات کا معتبر ذرائع سے جائزہ لے کر آئندہ اجلاس میں جامع رپورٹ اور تجویز پیش کرنے کا فیصلہ کیا۔
(جاری)
